ബഹിരാകാശനിലയത്തിലെ ഭക്ഷ്യ അവശിഷ്ടങ്ങൾ നശിപ്പിക്കുന്നത് എങ്ങനെയാണ് ?
സോയുസ് സ്പേസ് ക്രാഫ്റ്റിൽ ആണെങ്കിൽ അതിലെ യാത്രികർ ഉപയോഗിച്ച് ബാക്കിയാവുന്ന ഭക്ഷണത്തിന്റെ അവശിഷ്ടങ്ങളും അവയുടെ പാക്കുകളും മറ്റു വേസ്റ്റുകളും അതിന്റെ സർവീസ് അല്ലെങ്കിൽ ഓർബിറ്റൽ മോഡ്യൂളിൽ ആണ് ശേഖരിച്ചു വെക്കുക. തിരിച്ചു വരുമ്പോൾ ഈ മോഡ്യൂളുകൾ ലാൻഡിംഗ് മോഡ്യൂളിൽ നിന്ന് വേർപെട്ടു അന്തരീക്ഷത്തിൽ കത്തിനശിക്കും. ഐ.എസ്.എസിലാണെങ്കിൽ എല്ലാ മാലിന്യങ്ങളും വേസ്റ്റ് ബിന്നുകളിൽ സീൽ ചെയ്തു വെക്കും. ഐ.എസ്.എസിലേക്കുള്ള ഭക്ഷ്യ വസ്തുക്കൾ, വെള്ളം, ഓക്സിജൻ , ഇന്ധനം തുടങ്ങിയവ കൊണ്ടുവരുന്നത് റഷ്യയുടെ ചരക്കു വാഹനമായ പ്രോഗ്രെസ്സോ , യൂറോപ്പിന്റെ ഓട്ടോമാറ്റിക് ട്രാൻസ്ഫർ വെഹിക്കിളോ ( ATV ) ആണ്. അവയിലെ വസ്തുക്കളെല്ലാം മാറ്റിക്കഴിഞ്ഞാൽ, അവയിൽ ഈ മാലിന്യങ്ങൾ നിറക്കുന്നു. മാലിന്യത്തോടൊപ്പം അനാവശ്യമായ എല്ലാ വസ്തുക്കളും ഉപകരണങ്ങളും നിറയ്ക്കും. പിന്നീട അവ ഐ.എസ്.എസിൽ നിന്ന് വേർപെട്ടു അന്തരീക്ഷത്തിൽ തിരിച്ചു പ്രവേശിച്ചു കത്തി നശിക്കും.
